5.29.2015

跆拳實況

星期三請咗下晝假,啱啱好係小檬學TKD嘅日子,
中午食完飯收拾好心情就瞓左一個45mins嘅晏教
(雖然未夠,不過已經好好)
之後就同小檬落會所

今日有爸爸媽媽帶佢,好似特別開心
第一次見佢著套衫,好有型呀~

帶佢去到場地門口,反而係小檬話返比我地知點樣。
佢叫我地係到等,佢自己就換對鞋仔入去自己坐喺到等呀sir。

媽媽有機會睇佢學,影咗好多video呀~
媽媽學人剪咗條片

見到佢真係學得好開心。
熱身運動,壓腿,壓身,
雖然未係好叻,不過都會跟住,
跑跑跳跳,踢腳前前後後都做啱哂
每個步驟都跟住好乖冇偷步,
呀sir叫佢嘅指示都全部跟到!
成堂都會笑容滿面!!

有一個由細喺會所識嘅小朋友
都跟埋小檬一齊學,
雖然都係3歲大B,呢位小朋友就唔肯自己入去,
仲喊起上嚟。。最後媽媽就帶咗佢走!
我好感恩小檬真係好獨立好叻仔,
冇試過要黐住我或者婆婆唔肯入去,
或者喊嘅情況出現!

興趣班有時都唔係淨係為啲咩證書之類,
都可以透過上堂
學到同其他唔係學校嘅老師同學點樣相處!

雖然我唔會每個星期都請假帶佢去上堂,不過我好珍惜呢日,
我地一齊嘅時間係開心就得。

睇到小朋友開心,就係媽媽最大嘅動力來源!!

5.28.2015

樂童BB

妹妹豬入選咗奶粉公司BB廣告攝影

之前submit張相上去,
好似都要有啲like不過唔係要最多果隻(我最憎果啲)
上星期收到電話話入選咗(定係個個都有份?)
我都唔記得

按大會指示,預備好一件紅色衫,襯返奶粉嘅主色。
媽媽呢日為咗啲家事請咗下晝假,攪掂之後可以早啲出門口。
咁啱師姐地放假就成團一齊去。。。
妹妹豬真係威水,一個出show,咁多工作人員~

一去到都未熱身,就行去影相區域。
小檬就同師兄喺出面玩。

妹妹豬要先喺個盤到影返場賣豬仔相~

跟住就開始,爸爸媽媽好努力咁企喺AB位置到引佢笑

之前個姐姐話驚啲頭髮遮住佢塊面,叫佢頭髮攝耳仔~
唔知點解好似冇平時咁可愛
加上喺個盤仔到冇得郁,又有閃光燈,
陌生人,陌生地方。。。
真係冇咩笑容!! 

果到啲音樂又大聲,我唱首歌引吓佢笑到唱到嗌交咁!
 好在後來有啲bubble同個哥哥引吓佢玩吓就好啲,
都叫做有啲笑容。 

休息一陣(其實係我地休息)
攝影師哥哥又再嚟過。
我地出動妹妹豬偶像~ 小檬哥哥,
我又將佢啲頭髮拎返出嚟,終於有返啲自然嘅笑容!

廣告未出街,post少少算


影左差不多半個鐘,攝影哥哥話應該有,
我估計都係要一張半張,可以收工~

臨走crew 影張相~

雖然到最後可能得一個細細嘅頭(可能係萬中一點)
不過都總算有個機會等妹妹豬大個見到自己做過廣告BB
當係玩吓囉!
到有廣告出街再分享一吓~

p.s 感謝師姐冇叫嘅情況吓幫我影吓啲花絮
呢啲就係女人同男人嘅分別!

5.26.2015

家長新體驗~ 故事媽媽。爸爸

上星期五到咗小檬學校做故事媽媽

 學校安排咗啲時段,比家長們返學校講故事比小朋友聽。

我上個月已經諗緊講咩故事好。。。
一心諗住要搵啲故事書有pop up,
或者係揭起,拉起果啲。。。等小朋友覺得有趣啲,
時間一日一日咁過,我都冇的起心肝去搵

今個星期就喺屋企嘅書籍櫃睇吓有咩書啱。
發覺好似乎冇咩發揮
(哈哈,講到自己好勁咁!! ) 

於是就食晏時間喺公司附近嘅書局睇吓,終於決定講呢本。
莎莎到沙灘去

準時到達學校之後,等咗一陣,老師就帶住小檬出嚟迎接我地 
(原本淨係我,因為有爸爸喺到好似仲緊張,
不過爸爸車到我嚟都同埋一齊入去啦~ )

入到去,老師就叫小朋友同我地打招呼~
有少少緊張,不過好快就冇事好似平時咁講故事咁

一開始我就遮住沙灘兩個字。等啲小朋友估吓莎莎去邊到玩

佢地真係好叻,一睇就知道係沙灘!
講故事嘅時候我加插啲野等小朋友冇咁悶, 
莎莎著住啲咩呀?
估下莎莎去邊?
 莎莎游水嘅時候, 叫啲小朋友一齊扮游水,啲小朋友有動作零捨興奮!
游完水, 摸住個肚, 會點架??
見到啲咩食物呀?? 
問吓佢地有冇去沙灘玩呀, 莎莎愛清潔嘅沙灘,
叫啲小朋友要愛護環境
。。。等等等
大部分都喺按自己度好嘅point講,
不過都有啲爆肚!
到最後就揭曉莎莎去咗沙灘。

星期五下午已經收到學校嘅相,真係太快了!

teacher Genmami~ 
 

做緊帶太陽眼鏡呀

小朋友都好踴躍答我嘅問題,都好多反應~
扮游水水嘅時候都有跟住郁吓郁吓
 爸爸全程負責微笑嘅

整體嚟講,都算滿意自己嘅表現。
媽咪努力嘅原動力就係嚟自呢位忠心嘅粉絲!
睇吓佢聽到微微笑幾開心~

5.20.2015

下"沙"禮

母親節當日飲完茶都三點幾。。。
舅父話不如去游水,
都好喎。。其實呢日度度都多人,都唔想周圍去

原來佢地都諗住嚟我屋企會所游。

因果日天色不穩,驚有雷暴警告,於是就轉戰沙灘~
(有雷暴警告會所就唔開, 而我地都唔會落水, 沙灘都冇問題)

好在上星期已經摷哂啲夏天衫同泳衣出嚟
屋企行大約15分鐘就到,

一去到兩個都仲係呆呆豬喎



比個球波都未有笑容。。咁去玩啦


Beach Boy 

蛇仔媽送咗比佢好耐的泳褲仔終於啱著喇

Beach Girl

妹妹未有時間買新泳衣,好在舊年的仲僅僅啱著,
著多次先喇. 就嚟唔啱,好快露點~

妹妹豬上年已經到過沙灘,不過果時一舊飯,唔識比反應!
  呢次嚟一歲多啲,情況就完全唔同。


一開始一臉茫然


一踩落啲沙到就唔鍾意
eeee....

 嗚嗚嗚嗚

 一踩落啲沙到就唔鍾意,不停咁叫媽媽媽媽。。好好笑
沙灘啲人都望住妹妹,叫得咁大聲話佢好得意。。。哈哈

佢比起小檬已經叻叻,至少肯行先


不過之後就大叫媽媽



媽媽呢個時時候同咗哥哥裝水水,返嚟即刻拯救妹妹



之後耐啲就好啲, 坐喺到都冇問題,
不過就唔係好郁。。


跌膊好sexy

不過坐姿就.....

哥哥今次落到水邊唔驚喇~



坐喺度玩沙,完全冇難度喇



唔驚沙喇。。。


鍾意玩沙添


好用心 



哥哥同妹妹位置好似調轉咗!!



今次好在有舅父個電泵,呢個水床先可以好快完成。
  



做咩咁楚楚可憐?

睇朋友相話點解我咁輕鬆,因為我有強大嘅嘅湊B團隊
5個大人照顧2個小朋友,當然好輕鬆啦。



同舅父唧水水,爸爸當然係頭號目標啦。


影我?唧你吖喇
影完真係即閃,佢差啲唧到我


之前淨係買咗一支,
所以爸爸無冇得反擊。


玩得超開心

雖然呢度喺一個正式嘅海灘,有救生員當值。
不過水質真係麻麻喇。。。

好詳細解釋比妹妹豬聽

呢啲係"水水"

浪湧埋嚟有啲驚

同女女行吓

同仔仔玩吓

自己行吓行吓

過咗一個悠閒嘅母親節