3.31.2012

媽咪返工。了

@30/03/2012.


放完產假返左工已經一星期,
呢個星期超級累。。。 

媽媽要返工後,

BB 會由邊個湊呢?
相信大部分媽咪都煩惱呢個問題~

我返工之後,Baby G 會由婆婆湊婆婆屋企都算近我地,揸車大約十分鐘就到,
而且我返工條路都經過婆婆屋企。

於是我地每日朝早就揸車湊Baby G 到婆婆屋企,然後老公再車我返工。
到我們放工就可以食埋飯,或買野一齊食, 接返Baby G 返屋企。

雖然要返工又要湊夜晚會好累
但唔想婆婆咁辛苦,我地又可以見多Baby G 幾面。


期間都會請鐘點幫吓手做家務,我同婆婆都唔想請姐姐,
睇一段時間, 睇吓得唔得!

雖然每日都要走嚟走去,不過有自己人湊,
又可以盡量多啲時間見Baby G
我地辛苦啲都冇所謂
!!

尋日我一早有客,開左成日會,放工已經散哂,
返到屋企,同佢傾吓計,玩吓腳仔,佢好開心咁笑,就咩辛苦都忘記哂!!!


媽咪而家喺公司,好掛住你呀 ~~!!



3.25.2012

奶媽唔易做!


時間真係眨吓眼就過!
我的產假已經完,明天要返工喇!


返工之後的第一個問題就係仲食唔食到母乳?
為咗呢個問題,煩惱咗好耐!

首先係公司能夠比一個地方我泵奶?
問過公司, 都可以到會議室進行,
但如果會議室已經全滿便又要想辦法!

之後就係時間問題,
理想時間係食午飯泵一次,下午4點-5點再泵,

 但4/5點應該係最忙的時候,
雖側有兩個assistant 幫手,但啲嘢都要等我睇先出得街!
我行開咗即又係停頓落嚟! 不過半過鐘啫,應該可以呱!
如果要見客落廠又要諗點安排!

唉.. .好煩!
我覺得唔餵嘅機會好大.....
希望Baby G 明白Mami, 我呢兩個月已經好努力架喇!!

而家有機會,影對張相留念先!

(註:以上資勢唔正確,只係想影出來溫馨d~)

 其實我好鍾意Baby G 食奶個樣㗎,一臉天真可愛!
一開始食果時兩頭左擰右擰,口muk muk 咁搵奶G,仲要係極快速果隻,
好似電影果啲要上電咁!
之後食食下瞓著又好朦咁,眼半䦕合,又食又瞓,瞓瞓下又食兩啖! 
有時又凈係口郁郁,根本冇食!
食飽叫佢再食又扁咀!咪住個咀點都唔食!

baby G 有個小泥窩,不過要啜嘢先睇到



分享一吓我餵人奶嘅經驗
  • 我生完第一日已經比Baby G 啜,第三日已經上奶,其實真係自自然然就會有奶,唔使擔心冇。
  • 餵人奶真係好辛苦, 尤其係剛生完之後...手痛,尾龍骨痛,瞓到半夜凍冰冰又要爬起身。佢又要每個零兩個鐘食一次,呢頭瞓果頭又醒。。。
  • 我都唔係可以好堅持,都有補奶粉 , 喺咩情況下補?
瞓到半夜,真係好累,老公一問我就會懶(生完又話要好好休息,餵人奶好難休息好)
臨瞓之前,想佢可以瞓得耐啲(可以瞓大約4個鐘)
食完人奶,仲係好似唔飽,婆婆會話不如開奶比佢食。。。
出街之前,想佢唔好呱呱叫。。。(Baby G 一肚餓就大哭,好悽厲,好可憐,喊到拆天,一秒都唔等得!!!! )
我出左去覆診,針灸時候

我知道之上嘅全部係藉口!! 我都有啲後悔自己做唔到滿分。。。

過左滿月之後,我先試吓泵奶,
我朋友借左Medela ~ Mini Electric 同harmony 手泵我,
但係我兩個都係泵得兩分鐘就出唔到,
反而用手擠就得,於是我就用手擠!
開頭擠嘅量唔係好多,雖然知道泵出嚟同埋身嘅份量係唔同,
但都開始猶豫究竟之前果個月Baby G 有冇食飽?
試過擠完倒瀉左啲之後喊。。。
又覺得自己唔可以比到最好嘅佢。。。
我好擔心同唔開心, 但係堅持左一個星期到,
已經多左,如果繼續都可以勉強夠,
但, 又要考慮返公司嘅情況!

一早知奶媽呢條路唔易行!!

p.s. 之前試過食奶G可能覺得慢,又要樽樽,
但呢兩日佢又唔食樽樽....比媽媽奶G又食喎...
唉,咁返工之後點算呀仔~

真係一時一樣!!!

3.20.2012

Baby G . 突襲

滿左月之後,Baby G真係好似大個左啲,
 亦都冇好似之前咁換親片都喊,有時仲好enjoy 喺塊板到,
我地見佢咁高興,都會比佢喺到玩一吓,
玩咩??
都係玩腳仔囉!!

經過差不多個半月嘅訓練,我地換片嘅技巧同經驗都有所進步!
 但有時都會比佢殺一個措手不及!
爸爸幫佢換片時,突然間發再度出擊。。。
爸爸隻手中哂!!
 Baby G 個樣仲好似好梳干咁~



呢次係第一次突襲, 可能有左呢次咁爽嘅經驗,
之後好幾次都係等我地除左片片先再嚟。
其實我記得啲姑娘都有講過,因為BB除左片覺得舒服,
所以又會再去!
有一次,就我中伏,啲便便仲飛到落張被到!
婆婆果次就將啲尿尿用手擋返落片片度

而家,我地都會放鬆一吓片片之後,睇吓佢仲有冇得再去。。。
不過有時佢都有分上下半集!!!!
真係比佢激C~

3.17.2012

Baby G ~ 去街街

之前未有bb時,啲有小朋友嘅朋友成日叫我地好好珍惜自由嘅二人世界!
Baby G 除咗返健康院覆診/滿月出過街之外,都好少出街!
等佢大啲,希望陸續帶佢多啲出街

我想Baby G 大個之後都知道我地帶過佢去邊到,
我要好好記低, 因我成日都好想知道細個時,
爸爸媽媽帶左我去邊到玩,
以前可能唔會次次影相~

Baby G @ 公園
呢日見天氣暖d,所以同佢落咗公園玩
其實佢一路瞓....都冇理過我哋~


Baby G @ 稻香

呢日就同屋企人去稻香食飯,雖然酒樓好嘈,但佢都瞓得好淋!
食到一半佢醒左,又呱呱叫,好在婆婆喺到,可以幫吓手抱吓,等我地輪流食,
仲有位anutie 又鍾意湊B,自己未食完又幫我地湊。。。
你呀媽呀爸即刻可以輕鬆一下!

回程又喺瞓~~




Baby G @ 容龍海鮮酒家

呢間海鮮酒家係"米芝蓮推薦"餐廳,
佢可以自己買海鮮比佢整,又可以等佢幫你買,當然,等佢買會耐少少,
不過我地費是煩,於是就次次都叫佢地買埋。
尋晚婆婆冇嚟煮飯,而我又忽然好想食海鮮,所以決定去容龍食我long time no see  嘅至愛
~~
 "芝士焗龍蝦"

芝士焗龍蝦真係好食到呢!!!
海鮮豆腐湯都好好味! 好多料喺入面架,  連斑都有!!

平時d餸超耐,但今日好快!!仲等我地叫左個豬腳仔食住先, 不過都好好味






 外出準備:
Baby G 喺滿月果日已經坐過car  seat ,佢地都冇咩扭計,
呢張car seat 適合初生用,但係冇野固定頭仔,所以我買左呢個黃色小雞嘅頭
枕比佢,好在佢冇唔鍾意

Baby G 好似唔係咁鍾意,  紮糭咁。。。
(大佬,你張car seat 好貴架...)


坐車車都有用




so far 出街嘅經歷都ok!





3.14.2012

BB 打針日期

找到呢個website, 只要輸入bb生日,就可以出哂要打針的日子同其他重要日子, 值得一看:

copy from baby-mo

http://www.baby-mo.hk/greatevent.php


請輸入BB的出生日期:    月  

BB的出生日期:2012-01-26
衛生署建議接種疫苗日程(0-2歲)注射年齡預計注射日期
卡介苗、第一次乙型肝炎疫苗初生2012-01-26
第二次乙型肝炎疫苗一個月2012-02-26
第一次白喉、破傷風、無細胞型百日咳及滅活小兒麻痺混合疫苗兩個月2012-03-26
第二次白喉、破傷風、無細胞型百日咳及滅活小兒麻痺混合疫苗四個月2012-05-26
第三次白喉、破傷風、無細胞型百日咳及滅活小兒麻痺混合疫苗、第三次乙型肝炎疫苗六個月2012-07-26
第一次麻疹、流行性腮腺炎及德國麻疹混合疫苗一歲2013-01-26
白喉、破傷風、無細胞型百日咳及滅活小兒麻痺混合疫苗加強劑一歲半2013-07-26
其他大事年齡預計日期
母嬰健康院身體檢查初生2012-01-26
母嬰健康院聽力普查一個月2012-02-26
申領出生紙出生後42日內2012-03-08前


媽媽手

@10/03/2012

手腕痛(媽媽手)
終於頂唔住,睇左醫生喇~
醫生開左啲藥比我,但係我餵緊人奶,
所以最好唔好食喎。。。
搽藥膏會幫助少少,
帶呢個護手套會幫到少少,


@13/03/2012
今日再加針灸, 希望快啲好返啦!

其實我知我抱少啲, 會好啲,
除左餵人奶都一定要抱住Baby G,
但係我實在唔捨得,尤其係佢而家細細粒,好可愛~
大個咗,太重我都冇力抱架喇!

3.13.2012

扭。扭。扭。

而家仲未返工,有時媽媽未嚟,老公又返左工時,
我就要一個人湊G!

其實餵奶換片都唔難,最頭痛就係有時佢食完, 換完片之後仲扭計喊,
都唔知扭咩。。。。

佢食飽通常就會即瞓,有時就係唔知佢扭咩。。。。
唯有抱住佢,
又不自覺咁拍拍佢,等佢知道我安安撫緊佢,

到等到佢眼朦朦瞓著時,放佢落床仔之後,有時唔夠2分鐘佢又喊,好似知道你放低左佢咁!
 有時都會只係拍拍佢,等佢瞓返,再大喊先抱起佢!

如是者,一個半個鐘小不免, 糾纏完之後,
佢乖乖瞓著,我先可以free!

你睇佢得逞之後瞓得幾舒服。


其實滿左月之後,都好左好多
滿月之前情況仲嚴重,三更半夜抱住佢,已經行勻全屋都未肯瞓,
仲要搖又拍,咩都做齊都唔得!
雖知道拍慣搖慣唔好,但果一刻眼瞓嘅程度,
你只係想佢快啲瞓,而忘記所有其他嘅野!

果時我會試吓唱歌仔比佢聽,好似又得喎。。。
唔識啲新兒歌,我腦海仲係啲"瑪莉有隻小綿羊"嘅年代,
我唯有自己作左啲歌詞入呢首歌....

小B快啲瞓教豬,瞓教豬,,瞓教豬
小B快啲瞓教豬,快啲瞓教豬!!

小B快啲瞓教豬,瞓教豬,,瞓教豬
小B快啲瞓教豬,快啲瞓啦喂~~

如是者,重複又重複....zzz..zzzz..zzzzzz
扭眼瞓,真係好神奇!
我老公成日同佢講,你眼瞓咪瞓囉,又冇人阻你,
都唔知點解要扭。。。

爸爸媽媽好辛苦㗎,
尤其係夜媽媽,凍冰冰時。。。。

Baby G 健康院檢查

1st checking @ 03/02/2012

出世之後,我地就自己打電話去健康院預約BB覆診,
私家醫院生都可以返去做checking。


BB出世果時都冇黃,所以喺醫院唔使照燈,
不過醫生話最黃應該係出世後5至8日,所以呢日喺健康院要再睇呢個問題
好在,Baby G 只有小小黃,醫生話正常, 數字可以接受,所以唔使照燈。

Baby G 好似等得唔耐煩


不過其實我呢間已經唔算等得耐..冇咩B6

重量方面,出世時2.8kgs, checking時係2.87kg,姑娘話收左水,輕左都好正常,
但Baby G 呢日已經追返出世嘅重量, 姑娘話好好!

2nd checking @27/02/2012

 Baby G  weight 3.49kgs  頭圍35cm (出世時31cm)

食咗人奶一個月, 姑娘話bb重量都重得ok,
雖然夜晚或有時太累/出街有補奶粉,但總算有太部份係人奶,
對於全人奶嘅媽媽,確實佩服!!

見醫生時, 所有野都OK, 醫生仲讚Baby G啲皮膚靚添!!
冇乜粒粒 (但呢幾日好似多咗dd -_-)

之後喺度打埋乙型肝炎第二支針, 爸爸抱住,打開大脾仔,
姑娘一針打落去,Baby G 大哭。。。。
爸爸即即刻安慰佢話,唔痛嘅,好舒服嘅
個姑娘話,又未至於好舒服呱~
 最神奇就係,大哭完2秒之後又瞓返.....zzz.zzz

臨走,見到個工人姐姐喺度鍡緊奶,個bb好細粒,
之後見到佢爸爸媽媽出黎,仲一人抱一個!!!!!!!
即係3胞胎~~~~2仔仔 1女女

嘩.....我地服持1 個baby G 都已經好辛苦,
如果3個一齊黎,我諗我會顛咗
佢地爸爸媽媽真係受人景仰!!!!

3.06.2012

坐月

有左BB之後都有諗過請陪月,雖然有我媽咪幫手,但係都唔想佢咁辛苦,
但係當時未穩定,又未咁請住,到差不多嘅時候,好多都已經full!
 尤其我預產期係新年時候,好多都唔接。。。
有都係啲未有經驗嘅。。。所以最後決定唔請!

公司同事嘅媽媽係陪月,但佢已經接左order,雖然係咁,佢好好人,
上左嚟過啲料比我媽咪!
教佢煲啲咩煮啲咩,又教點沖涼換片,上左一個short course!

如是坐月就由我媽幫手~
(99初時幫吓手買餸,但後來耳水不平衡,冇嚟lu。。
我媽咪一個攪掂)

坐月嘅時得好快又好單一
早上起來(由於餵奶,其實已經冇分日夜), 先食早飯,通常都係排骨飯呀。
雞飯呀。肉餅飯呀。薑炒飯呀。田雞飯呀
之後嘅時間又應該係鍡奶, 餵完就休息一下,
好快又食中午飯,蒸肉餅呀。蒸雞呀。蒸牛肉呀。蒸豬肉呀。菜心。都係啲清淡啲,
飲吓魚湯 (我之前要輸血,血色素低,所以醫生叫我唔好進補住...)

雖然未進補,但係我體重好似冇減過。。。停滯左。
我生之前98lbs, 最後生之前好似係128lbs,上星期係為114lbs,
即係成個懷孕時間重左30lbs, 而家只係輕左14lbs
點解仲有咁多未減到嘅?

食完飯休息一下就沖涼,我媽咪喺我大肚時已經重覆幾千次話唔可以濕水/沖涼洗頭,
不過我又解釋幾千次以前冇熱水用井水,就梗係驚凍親,而家唔同架喇!!
 健康院姑娘都話可以!
雖然係咁講,我初頭都諗住自己會起碼生完一星期先沖涼洗頭,
但喺醫院返黎第一日,
媽咪已經煲薑水我沖涼,我梗係拿拿林去沖啦!
(我的方法: 將薑水倒入水桶,再用凳long高佢,咁可以唔使彎身,再用水殼畢水淋身)
我仲喺彩豐行買左薑味洗頭水同沖涼液添~
洗完頭即刻吹乾唔好凍親!

沖完就到Baby G 沖
之後又係瞓~

坐月最好飲代茶,媽咪整左炒米茶


坐月其間都有出街,去覆診。。健康院。。去針灸。。
出街要帶頸巾/帽保暖
保暖好緊要,記得著襪,中醫話對腳暖全身都d暖!

在我嚟講,坐月最辛苦唔係要食重複嘅食物,而係身體未復元仲要照顧Baby G
雖然我老公同我媽咪已經幫我唔少,但係要餵人奶時,已經唔可以假手於人,要親力親為!

我生完之後頭一星期傷口雖然唔痛,但係都有啲唔舒適,坐嘅時候都要就住就住
。。。。好痛!!

過多兩星期,再加埋條尾龍骨痛,坐都坐唔到,要則則身坐先得,但坐得耐又突然一吓好痛傳上嚟
。。。。好痛!!

一對手腕又痛, 抱Baby G 餵奶/換片時真係抱一吓痛一吓,但係又唔捨得唔抱,抱住佢已經好開心!
連刷牙,洗頭,呢啲咁簡單嘅動作都痛
(冇諗過生仔對手都痛, 西醫話賀爾蒙影響,叫"媽媽手",中醫話啲係寒氣,教我用艾草煲水浸手,而家都叫好返啲)
相信做左媽媽先只可以忍耐呢啲痛
。。。。好痛!!

我成日問我老公幾時痛完,佢話好快,我話呢句說話我由大肚聽到生完。。。

之前諗坐月好悶,但其實時間好過,
而我,
就喺個痛字裡面渡過,
不過見到Baby G, ,就咩都可以忍受!




3.02.2012

Baby G 寫真 ~ 2

Baby G 寫真 ~ 2

影完單人,就加埋爸爸媽媽啦!

雖然媽咪嘅麒麟臂/肥肚腩/雙下巴/眼袋好出~ 不過我都豁左出去喇!







另類全家福
Baby G:  "TC 哥哥, 你點解要我同爸爸擺個咁難嘅pose 呀?
嚇親我媽咪喇~~~~~"
呢張相佢啲手手腳腳好似好長~




諗住只係影BB,我地只係陪角,冇諗過爸爸媽媽都要犧牲,
仲要我喺毫無準備坐緊月嘅時候,要露肉著背心。。。唉。。算啦~~


溫馨全家福


我們的寶貝~~










其實仲有啲肉照,不過太嚇人。。。都係唔post喇~~ 驚驚!

最後送上三點不露嘅Baby G~~